Ipinahayag ni National Bureau of Investigation Director Atty. Melvin Matibag na dai na siya nagngalas sa komento ni Vice President Sara Duterte manungod sa ari-arian na iniimbestigaran.
Dai na daa siya nasorpresa kan ipangatad kan ikaduwang presidente na saiya an lote na sinasabing ‘misdeclared’ daa.
Inaasahan na daa kan direktor na ipangangatad ni Vice President Duterte an ari-arian, mantang saiya man idinugang na igwa sinda nin malinaw na ebidensya.
Kaya nagtutubod an direktor na pinakamarhay daang gibuhon iyo an personal na bisitahon an lote sa Barangay Catigan, Davao City na base sa SALN, nakadeklara bilang sarong ‘agricultural land’.
Kasuhapon, ibinahagi ni NBI Dir. Matibag na ipapasa ninda sa Office of the Ombudsman an mga ebidensyang nakua sa imbestigasyon manungod digdi.
Kahon-kahon na ebidensya an dinara kan mga NBI Agents sa Ombudsman tanganing suportahan an nagin resulta kan imbestigasyon manungod sa ari-arian kan ikaduwang presidente.
Huli kaini, kun naghahalat nin patawag an bise presidente, bako na an kawanihan an magpapaluwas nin ‘subpoena’ kundi posibleng an Tanodbayan na daa, bilang igwa nin hurisdiksyon sa kaso.
Dugang pa kan direktor, ‘agricultural land’ daa an nakadeklara sa SALN kan bise presidente alagad mapapansin na sa laog kaini igwa pa nin ‘helipad’.
