Padagos na kinukundisir sa Partido State University an manlaen laen na aktibidad kan SCUAA 2026
Sa entrevista kan Bombo Radyo ki Jess Ortinero, Chair- Comm on Internal and external communications, sinabi kaini na an State Colleges and Universities Athletic Association (SCUAA) sarong kompetisyon kun saen nagtitiripon an siyam na state colleges asin universities sa bilog na Rehiyon Bicol, kabali an mga institusyon hale sa Masbate, Catanduanes, Sorsogon, Camarines Norte, asin iba pa.
Segun ki Ortinero, an SCUAA sarong aktibidad na nagtatampok kan mga talento asin kakayahan kan mga estudyanteng atleta kun saen nagraralaban laban sa mga manlae-laen na sports events.
Tinatayang nasa 3,000 katawo na an nakikilahok sa aktibidad, kabali na an mga coach, atleta, asin mga opisyal hale sa iba-ibang kolehiyo asin unibersidad sa rehiyon.
Haloy man an ginibong preparasyon para sa pagdaraos kan aktibidad kun saen saro sa mga nagin hamon kan mga tagapag-organisa an badyet, kaya nakikipagkoordinar sinda sa mga lokal na pamahalaan o Local Government Units (LGU) para sa kinakaipuhang suporta asin masigurong maayos an pagdaraos kan mga kompetisyon.
Naging maayos man an pagbukas kan naunambitang aktibidad.
Nanginginot na man an Bicol University sa presenteng medalya, sinusundan kan CSPC sa ikaduwang pwesto, mantang nasa ikatulong pwesto an Partido State University.
Padagos man an mga kompetisyon sa dancesport, volleyball, basketball asin iba pa.
Tg-eenkaminar man an publiko na suportaran an mga atleta asin bukas an mga aktibidad para sa mga gustong magtanaw kan mga kompetisyon.
Mientrastanto, an gabos man na mga atletang mangagana, an marepresentar sa Rehiyon Bicol sa National SCUAA na nakatalaang gibohon sa sunod na taon.
