Kinuwestyon ni Atty. Jess Falcis, sarong bistadong kritiko kan pamilya Duterte, an desisyon kan House Prosecution panel na i-withdraw an duwang impeachment article na enot nang iprinisentar sa Senate Impeachment Court.
Segun ki Atty. Falcis, bakong makatanosan an ginibo kan House panel na pagkatapos nindang makapaglatag nin ebidensya asin testigo, saka man sana babawion an mga alegasyon.
Iginiit kan abogado na dawa pa dai niya gusto si VP Sara Duterte asin si dating Presidente Rodrigo Duterte, bakong man giraray akseptable an ginibo kan prosecution huli ta pinagkakaitan ninda nin oportunidad an kampo kan respondent na simbagan sa tamang forum an duwang alegasyon na enot nang ibinabato saiya.
Karapatan man suboot kan respondent na maipahiling sa sarong televised proceedings an saindang nakolektang ebidensya sarong bagay na dai man dapat ipagkait sa sainda arog kan ginibo kan prosecution.
Binatikos man ni Falcis an pahayag kan prosecution na pwedeng sumimbag si VP Sara sa iba pang forum arog kan mga press conference, o sa online platform.
An nasabing pahayag, pwedeng ibilang na ‘gaslighting’, asin bakong akseptable, maski sa laog kan korte o sa mga ordinaryong diskusyon.
Naninindugan an abogado na dawa pa kakampi o pabor siya sa prosecution, bakong makatanosan na dai tawan an kampo ni VP Sara nin oportunidad na sumimbag sa saindang mga alegasyon asin madangog an anuman na ebidensya na ihahampang.
