Liwat na pinagkuwestiyon ni Vice President Sara Duterte an suhestiyon kan gobyerno na paggamit nin mga balde bilang pagpreparar sa posibleng epekto kan El Niño phenomenon sa nasyon.
Sa saiyang pakikipagpulong sa mga overseas Filipino worker o OFW sa Hong Kong kan nakaaging Domingo, Nobyembre 8, sinabi ni Duterte na bakong supisyente an pagpreparar nin mga balde para makaipon nin tubig-uran, orog na kun magresulta sa grabeng tagtuyot an inaasahang epekto kan El Niño.
Segun sa Bise Presidente, dapat tutukan kan gobyerno an mas mahiwas na pagpreparar, partikular an pagseguro nin supisyenteng suplay nin pagkakan sa panahon nin posibleng kakulangan sa tubig.
Idinugang man niya na base sa mga patanid kan mga eksperto, posibleng umabot sa drought o grabeng tagtuyot an epekto kan El Niño, kun sain pwedeng tulos na magmara an mga ginikanan nin tubig.
Giit ni Duterte, kinakaipuhan na magkaigwa nin konkretong plano an gobyerno para matugunan an posibleng epekto kaini sa suplay nin pagkakan asin kabuhayan kan mga Pilipino.
An pahayag kan Bise Presidente kasunod kan suhestiyon ni Presidente Ferdinand Marcos Jr. na magpreparar nin mga balde para makakolekta nin tubig-uran bilang parte kan pagpreparar sa inaasahang El Niño.
