Dae pa ikinokonektar kan Department of the Interior and Local Government (DILG) an sarong drug syndicate na nakabase sa Davao sa nakumpiskang hinihinalang P3.5-bilyong shabu shipment sa Laos.
Segun ki Interior Secretary Jonvic Remulla, nakasentro an imbestigasyon sa pagmidbid sa mga indibidwal na posibleng imbwelto, mantang natukoy na suboot an Golden Triangle bilang ginikanan kan 521 kilo kan hinihinalang shabu.
Midbid kan mga awtoridad si dating Bangsamoro parliament member Edrieza Hadji Nasser Rimbang bilang suspek na pinaghihinalaang nagpondo sa pag-areglo kan pribadong eroplano na magdadara kan droga hale sa Laos pasiring sa Maynila. Alagad, dae pa isinasara kan mga imbestigador an posibilidad na igwa pang ibang personalidad na imbwelto.
Lininaw man ni Remulla na mayo pang naitatag na koneksyon si dating Presidente Rodrigo Duterte sa suboot na smuggling operation. Padagos an pagmidbid kan Philippine National Police asin Philippine Drug Enforcement Agency sa mga tawong posibleng imbwelto asin sa mga transaksyong pinansyal, mantang pighahalat an laboratory results hale sa Laos tanganing makumpirma an nakumpiskang substance.
