Nagdagdag nin electric fan asin exhaust fan an Naga City Police Station 1 sa saindang custodial facility bilang preparasyon sa posibleng epekto kan El Niño, partikular na an labi-labing init sa lugar.
Sa intrevista kan Bombo Radyo Naga ki Rowena Lim, PIO kan Naga City Police Station 1, sinabi kaini na nagbugtak sinda nin mga electric fans asin exhaust fans tanganing mapagayon an bentilasyon sa pasilidad, partikularmente sa mga lugar na ginagamit bilang lobby asin custodial facilities.
Dugang pa ni Lim na plano man nindang labutan an salming na pinto tangani na mas madali an pagbukas kun kinakaipuhan, alagad sisiguraduhon na salbado an nasabing installation.
Dugang pa ni Lim, an mga electric fans sa lobby piggagamit kun sobrang init, mantang an ibang equipment ready na o naka-standby para sa cooling.
Manungod sa pondo para sa dagdag na bentilasyon, sinabi ni Lim na posibleng ihalo ini sa budget kan police station, tangani bukas sinda sa posibilidad na igwang magdonar para sa proyekto.
Mientrastanto, aminado man si Lim na igwa pang ibang mga problema sa istasyon kan pulis na kaipuhan na tawan nin atensyon, arog kan pag-ventilate kan custodial facility.
