Nagtao nin impormasyon manungod sa badyet, mga programa asin mga polisiya kan lokal na gobyerno an Dagyaw Naga 2026, na ginibo sa Sarong Mall sa Naga City.
Sa intrevesta kan Bombo Radyo Naga, ipinaliwanag ni Elmer M. Villanueva Jr., City Local Government Operations Officer, na paagi sa Open Budget Portal, mas madali nang maaakses kan mga residente an impormasyon manungod sa badyet asin mga programa kan siyudad.
An aktibidad kabali sa Open Government Partnership Localization Program, na isinasagibo sa pagtambayayong kan Department of the Interior and Local Government o DILG asin kan Naga City Government.
Kabali sa mga tampok na programa kaini an Naga City People’s Budget, na naglalayong mapakusog an transparency, accountability asin partisipasyon kan publiko sa proseso nin pagbabadyet.
Dugang pa ni Villanueva, importante an aktibong pakikikabtang kan mga residente tanganing masiguro na an mga programa asin proyekto kan siyudad nakasimbag sa pangangaipo asin mga adbokasiya kan komunidad.
Inapod man niya an mga taga-Naga na mas makikilahok sa mga programa kan lokal na gobyerno asin magin mga ahente nin positibong pagbabago sa siyudad.
