Pigbandera kan People’s Budget Coalition sa Senado an labi sa P1 trilyon na kantidad nin alokasyon sa proponidong 2027 national budget na saindang binibisto na may ‘red flags’ o dapat na imbestigaran.
Sa hearing kan Senate Finance Committee, sinabi ni coalition co-convenor na si AJ Montesa na kabale sa pigkwestyon na fondo an P210 bilyones sa soft pork, P695 bilyones sa hard pork, asin P112 bilyones sa shadow pork o unprogrammed appropriations.
Nagpahayag man nin takot an grupo manungod sa haros siete mil na proyectos na nagkakantidad nin P190 billion na suboot mayo nin mga dokumento na pwedeng ma-access kan publiko.
Segun ki coalition co-convenor na si Kenneth Ibasco Abante, dae man ninda inaakusaran nin kurapsyon an gabos na proyekto, alagad nanindugan ini na dapat igwang malinaw asin supisyenteng dokumentasyon para sa mga proyekto na papagastusan kan buwis kan mga namamanwaan.
Huli kaini, nangapudan an grupo sa Senado na repasuhon asin haleon sa propuestong budget an mga proyectong mayong published documents, mantang an Bicameral Conference Committee piglalaoman na maaprobaran an P7.2-trillion national budget proposal para sa 2027 sa Disyembre.
