An Philippine Airlines (PAL) magpapautob nin “passenger attestation” para sa gabos na pasahero pasiring United States, na magigin epektibo sa Nobyembre 3, 2026.
Ini tanganing kumpirmahon na an mga pasahero dai nagduman sa Democratic Republic of the Congo sa laog nin 21 araw bago an saindang flight, kasunod kan utos kan U.S. Centers for Disease Control and Prevention (CDC).
An utos kan CDC nagmamawot na pugulan an paglakop kan Ebola virus, na nagpapahiling nin naglalangkaw na kaso sa Congo, tanganing masiguro an kaligtasan sa salud kan publiko sa United States.
Sakop kan polisiya an gabos na pasahero, anuman an saindang nationality, kaiba an mga naglaog o nag-transit sa Democratic Republic of the Congo sa paagi kan himpapawid, daga, o dagat.
An mga pasaherong dai makakapagsumite kan kinakaipuhang “CDC attestation” dai tutugutan na makalaog sa United States.
Para sa mga pasaherong hababa sa 18 taong gulang o idtong may pisikal o mental na kapansanan, an magurang o awtorisadong indibidwal an pwedeng magpuno kan porma para sa sainda.
An regulasyon na ini magdadanay na epektibo sagkod Disyembre 18, 2026, apwera na sana kun ini babawion kan US CDC.
