Nagpapadagos an imbestigasyon kan mga awtoridad manungod sa banta nin pambobomba asin pamamadil sa University of Nueva Caceres (UNC) sa Naga City, Camarines Sur.
Sa intrevista kan Bombo Radyo Naga ki PMAJ. Angelo Babagay, Team Leader, Naga Camarines Sur Cyber Response Team, sinabi kaini na igwa na nin mga person of interest sa kaso, alagad dai pa natutukoy an mga responsable sa insidente.
Bilang parte kan imbestigasyon, sinusuri kan mga awtoridad an mga kua kan closed-circuit television (CCTV) tanganing matukoy an mga tawong naglaog asin nag-agi sa lugar kun sain nakua an surat.
Nagpapadagos man an pagtipon nin mga posibleng ebidensiya na makakatabang sa pagbisto sa nasa likod kan pagbabanta.
Segun ki Babagay, kun an banta naresibe online, ipinayo niya na kuanan nin screenshot bilang ebidensiya, alagad dai ini ipasa o ikalat sa social media asin mga group chat tanganing malikayan an paglakop nin takot asin panic sa publiko.
Tinawan-doon man niya na kun mapatunayan na menor de edad an imbuelto, ipapasa sa Department of Social Welfare and Development (DSWD) an maninigong pagsusuri asin pagproseso susog sa mga presenteng ley.
Nagpatanid man si Babagay sa mga hoben na nag-iisip na maggibo nin arog kaining klase nin pagbabanta bilang sarong suba, huli ta ini pwedeng magresulta sa kasong legal asin iba pang seryosong konsekwensiya.
Padagos na naghihiro an mga awtoridad tanganing matukoy an responsable asin maseguro an kaligtasan kan mga estudyante asin kan bilog na komunidad kan UNC.
