Sa pag-abot kan Undas, tinatawan nin pagrespeto asin paggirumdom an mga nagadan na marine mammals sa Cetacean Cemetery na nasa compound kan BFAR Regional Office 5 sa Fabrica, Bula, Camarines Sur.
Sa intrevesta kan Bombo Radyo Naga ki Wheng Briones,spokesperson kan BFAR Bicol, sinabi kaini na itinatag an Cetacean Cemetery kan 2013 tanganing mapakusog an kaaraman kan publiko manungod sa importansya kan mga balyena asin dolphin sa marine ecosystem.
Suno ki Briones, may kabuuang 14 na marine mammals na nakahimlay sa nasabing sementeryo. An kadaklan sa mga ini mga hayop na na-stranded sa baybayon o kaya nadiskubre kan mga mangingisda.
Kabilang sa mga species na nakalubong sa lugar an Rhesus Dolphin, Spinner Dolphin, Fraser’s Dolphin, Dwarf Sperm Whale, Brutus Whale asin Striped Dolphin.
Nag-aalay nin mga asin kandila an mga empleyado kan BFAR Bicol bilang tanda nin pagrespeto sa mga marine mammals. May mga turista asin residente man na nagbibisita sa lugar.
Dugang pa ni Briones, mahalagang magin responsable an publiko sa pag-ataman kan kadagatan. An pagtatapon nin plastik asin iba pang basura sa dagat puedeng magin sanhi nin pagkasakit, pagkasugat, asin pagkagadan kan mga marine mammals kun malulon kan mga ini.
Nagtao man siya nin paalala na kun may mahiling na marine mammal na na-stranded sa baybayon, dapat na makipag-ugnayan sa lokal na gobyerno o sa pinakamalapit na opisina kan BFAR para sa tamang pagtabang sa hayop.
Sa huri, iginiit an importansya nin pagrespeto sa mga marine mammals asin pagprotekta sa karagatan, bako sana sa panahon nin Undas kundi sa aroaldaw na pamumuhay.
