Nagbabala an Philippine National Police-Anti Cybercrime Group (PNP-ACG) sa publiko manungod sa manlain-lain na klase nin online scam huli sa pighihiling na paglangkaw kan online transactions ngunyan na holiday season.
Segun ki PNP-ACG spokesperson Police Lieutenant Colonel Zyrah Joy Cabal, parati nang ginagamit kan mga scammer an pekeng promos, kunwari nanggana, asin delivery scams tanganing makapangloko.
Pinagrayo niya an publiko na dai basta-basta mag-click nin mga link na ipinapadara sa text asin seguraduhon na lehitimo an mga website asin account bago magpadara nin kwarta.
Pig-enkaminar man an mga nabiktima na tulos magsumbong sa Anti-Cybercrime Group asin magdara nin ebidensya arog kan screenshots kan pag-urulay, resibo nin bayad, pangaran kan account, contact number, asin link kan profile kan scammer.
Pigtawan-duon ni Cabal na dai dapat ikasupog an pagreklamo tanganing maprotektahan an kwartang pinagpagalan kan publiko ngunyan na Pasko.
