Piglalaoman kan Bangko Sentral ng Pilipinas (BSP) na an implasyon para sa bulan kan Oktubre ngonyan na taon, posibleng umabot sa pag-ultanan kan 7.1 sagkod 8.1 porsyento.
Sa pahayag na pinaluwas kan BSP kan nakaaging Biyernes, Oktubre 30, pwedeng maglangkaw an implasyon sa nasabing rate huli sa pagtaas kan presyo kan petrolyo sa nasyon, singil sa kuryente, asin pamasahe.
Dugang pa kaini, pwedeng bumaba man ini huli sa pagbaba kan presyo kan mga pangenot na agricultural products arog kan gulay, karne, sira, bagas, asin sira huli sa igwang supisyenteng supply.
Mantang, padagos man daa na tututukan kan BSP an pagbantay sa mga datos, kaiba na an mga pangyayari sa Middle East asin an mga piglalaomang epekto kaini sa ekonomiya kan nasyon.
“Mananatiling mapagmatyag ang BSP at gagabayan ng paparating na datos, lalo na sa inflation at inaasahang paglago ng ekonomiya ng bansa. Patuloy ding susuriin ng BSP ang epekto ng mga pinakabagong kaganapan sa Gitnang Silangan sa inflation at ekonomiya ng bansa,” nakasurat sa pahayag.
Kan nakaaging Setyembre, nag-abot sa 7.2 porsyento an implasyon.
Kun sakaling umabot ini sa 8.1 porsyento sa bulan kan Oktubre, ini an marehistro bilang pinakahalangkaw na inflation rate sa laog kan tulong taon poon kan nag-abot an implasyon sa 8.6 porsyento kan Pebrero 2023.
Nakatalaan man na magpaluwas an Philippine Statistics Authority kan opisyal na tala kaini kan implasyon para sa bulan kan Oktubre sa maabot na Nobyembre 5.
