Nagkundusir an Philippine Statistics Authority (PSA) nin PhilSys registration para sa mga Persons Deprived of Liberty (PDL) tanganing matawan sinda nin physical national ID bilang parte kan pagselebrar kan National Correctional Consciousness Week o NACOCO Week,.
Segun sa pamayo kan correctional facility, katuyuhan kan aktibidad na tabangan an mga PDL na mayong valid identification card, na parati nagigin ulang sa saindang pag-access sa manlaen-laen na programa asin serbisyo na itinao kan gobyerno.
An nagkapirang PDL nagkakaproblema sa pagkua nin ID huli sa kakulangan sa dokumento asin maging sa kakayahan na magbasa asin magsurat. Huli kaini, katuwang an PSA, isinagibo an registration tanganing matawan sinda nin oportunidad na magkaigwa nin sadiring physical ID.
Target na marehistro an nasa 100 sagkod 150 PDL, na tawan nin prayoridad an mga mayong ano man na pagkakabistuhan.Bago kaini, nagsagibo man nin PhilHealth registration para sa mga PDL kun sain an nagkapira sa sainda tinawan man kan saindang PhilHealth ID.
Mientrastanto, kaiba pa sa mga aktibidad ngunyan na semana an programang “Direkto sa Loob Kang Rehas,” kun sain matatawan nin oportunidad an mga PDL na maghapot manungod sa saindang mga karapatang pantao, kaso asin proseso kan parole asin probation.
Pigsierto man kan opisyal na ipagpapadagos an pakikipagkoordinar sa manlaen-laen na ahensya kan gobyerno tanganing mas dakul pang oportunidad asin serbisyo an maihatod sa mga PDL, bako sana tuyong NACOCO Week kundi pati na sa mga masunod na panahon.
