Padagos an imbestigasyon kan pulis kan Nabua, Camarines Sur dapit sa suboot pagpinta asin pagmarka nin mga lapida sa kamposanto kan banwaan, na imbuelto suboot an duwang pigtutubudang indibidwal.
Segun ki PLTCOL Ciriaco Pacer Jr., Chief of Police kan Nabua, sinaysay kaini na yaon sa istasyon kan pulisya an sarong menor de edad na testigo, kaibanan an saiyang guardian tanganing magtao nin pahayag dapit sa insidente.
Segun sa opisyal, nasaksihan kan testigo an pagpintura asin pagmarka kan mga lapida.
Sa ngonian, pig-eeksamin pa kan mga otoridad an istorya kan testigo asin an aktuwal na kinamumugtakan kan mga lapida ngani na maaraman an bilog na detalye kan insidente.
Sinabi man ni Pacer na dae pa ninda nakukuestion an duwang pigtutubudang indibidwal ngani na maaraman an saindang lado asin motibo sa likod kan suboot ginibo.
Piglalaoman na sa mga masunod na aldaw, makukua na kan mga kapulisan an mga nasabing indibidwal ngani na matawan nin pagkakataon na makapagpaliwanag.
Mientrastanto, nagpaluwas nin patanid an Nabua Police sa publiko na igalang an privacy kan publiko asin pribado asin likayan an anuman na aksyon na pwedeng makaraot sa privacy kan ibang tawo.
Tinawang-duon man kan pulisya na an sisay man na mapatunayan na nagbalgar sa ley an maninimbag sa magkakanigong legal na lakdang.
