Pig-atasan kan International Criminal Court (ICC) ki dating Presidente Rodrigo Duterte na magin pisikal na presente sa gabos na aldaw kan saiyang pagbista sa sarong kaso nin krimen laban sa katawohan na nakatalaan na magpoon sa Nobyembre 30, 2026 sa The Hague, Netherlands. An ICC Trial Chamber III Presiding Judge Joanna Korner nagduon kan pagboot na ini sa ikalima asin huring Conference sa estado kan kaso na ginibo ngonian na Lunes, Nobyembre 2.
An nangengenot na abogado ni Duterte, si Peter Haynes, uminoyon sa pagboot kan korte asin nag-asegurar na an saiyang kliyente yaon sa korte kun magpoon na an pagbista.
Dawa na tinugutan an dating presidente na dai mag-atender sa status conference makalihis na i-waive an saiyang deretso na mag-atendir, inotro kan korte na obligado siyang mag-atubang oro-aldaw sa bilog na duration kan trial.
Mientras tanto, kinumpirmar ni Senior Trial Lawyer asin ICC Prosecutor Julian Nicholls na poco mas o menos 29 testigo hale sa Pilipinas an nakatalaan na magtestigo sa paagi nin video o audio-visual link (AVL).
Huli sa pitong oras na pagkakaiba kan oras sa pag-oltanan kan Pilipinas asin Netherlands, inayos kan korte an iskedyul tanganing malikayan an pagproseso sa mga testigo na lampas alas 8 nin banggi. sa Manila.
Bilang resulta, an pagdangog sa The Hague pwedeng magpoon nin mas amay mga alas 8 nin aga duman, na katumbas kan alas 3 nin hapon.
Pinagbotan man ni Judge Korner an prosekusyon na dangugon nguna an mga testigo na pisikal na presente sa korte bago an mga aapodon sa paagi nin video conferencing tanganing mamantenir an kahusayan kan pagbista.
An ICC nag-implementar man nin iba pang mga logistical adjustments kabali an pag-adjust kan seating schedule sa laog kan courtroom para sa marahay na progreso kan hearing.
Dugang pa, an tribunal nagpaluwas man nin organisadong iskedyul para sa mga nakaiskedyul na oras nin pahingalo, pahingalo sa pangudtohan, asin pahingalo sa hapon sa bilog na pagbista.
An dating presidente nag-aatubang nin kasong may relasyon sa suboot panggagadan asin mahiwas na pagbalga sa deretso pantawo sa irarom kan saiyang kampanya kontra droga.
An makasaysayan na pagbista opisyal na mapoon sa Nobyembre 30, na an prosekusyon nakatalaan na magpresentar kan saindang mga pambukas na argumento asin ebidensya.
