Haros sampulong European flights an naantala matapos suboot na targeton nin bomb threats kan Martes, Nobyembre 3.
Nagkaigwa nin karibongan sa nagkapirang paliparan sa Europe kun sain napiritan na pansamantala isara an sarong paliparan sa Warsaw, Poland.
An Irish-owned asin budget carrier na Ryanair an labi na naapektaran kan nasabing mga banta, kun sain apat na “flights” kaini pasiring sa manlaen-laen na destinasyon an target kan bomb threats.
Segun sa Metropolitan Police kan London sa United Kingdom, nairehistro an mga banta sa mga flights na nakatalaan na lumupad asin mag-landing sa Heathrow Airport, saro sa pinaka-abala na paliparan sa Europe.
Kaugnay kaini, ipinamobilisa man an air forces kan Italy tanganing i-escort an saro pang flight kan nasabing “carrier” hale sa Dublin asin nakatalaan na mag-landing sa Rome-Fiumicino Airport.
May duwang report man na nairehistro sa duwang eroplano pasiring sa Warsaw, Poland, kabali an sarong Scandinavian Airlines (SAS) flight hale sa Copenhagen asin saro pang flight hale sa Heathrow na pinapadalagan kan Polish “airline” na LOT.
Maski na nairehistro an serye nin mga banta, mayo man nin nadiskubreng explosives sa nasabing mga paliparan asin eroplano matapos na magsagibo nin mahiwas na ground search an mga awtoridad na imbwelto digdi.
