Piglalaoman na maatubang an kampo ni Bise Presidente Sara Duterte nin mga importanteng isyu mantang nagpapadagos an impeachment trial sa Senado, partikularmente sa mga alegasyon nin dae maipaliwanag na yaman, bank accounts, mga deklarasyon sa Statement of Assets, Liabilities and Net Worth (SAL-N), asin pagsasadiri nin mga propiedad.
Sa intrevista kan Bombo Radyo Naga kay House prosecution panel member asin Representative Terry Ridon, sinaysay kaini na turno na kan depensa na magsimbag sa mga alegasyon na iprinesentar kan piskalya, kabale na an suboot paglangkaw kan yaman hale sa P800 milyones sagkod sa P1.5 bilyones.
Kabali sa mga isyung gustong linawon kan piskalya iyo an suboot discrepancy kan kantidad na nakasurat sa 2023 SAL-N ni Duterte asin kan bank, insurance asin investment accounts na sinasabing nagkakantidad nin P100 milyones. Mawot man ninda nin paliwanag an mga mansyon asin iba pang propriedad na pigtutukdo suboot kan National Bureau of Investigation (NBI) sa mga lugar na may relasyon sa record kan Land Registration Authority (LRA). Tinawang-duon ni Ridon na importante para sa bise presidente na ipaliwanag an mga nasabing dokumento asin impormasyon.
Tututukan man kan prosekusyon an mga defense witnesses, kabale an mga corporate officials na pwedeng magtao nin liwanag sa soboot pagsasadiri ni Duterte nin shares sa GenCorp asin MetaCity. Sigon ki Ridon, kabale sa mga posibleng hapoton sa cross-examination iyo an aktwal na pagsasadiri kan bise presidente sa mga shares asin papel sa mga kumpanya, urog na ta may suboot mga discrepancies sa pagultanan kan impormasyon na nakasurat sa saiyang SAL-N asin records sa Securities and Exchange Commission (SEC). Mawot man nindang linawon an mga transaksyon sa credit card na pig-aatribwir ki Tony Manscarpio, kabali na an suboot P200,000 na ginastos sa pagkakan asin sapatos.
Mientrastanto, sinabi ni Ridon na preparado an piskalya na magkontra sa mga mosyon asin testimonya na sa saindang pagheling dae nin kinaaraman sa mga pinag-oolayan na isyu, ngani na mamantenir an iskedyul kan pagbista. Katakod kaini, naglalaom ini na magpaluwas nin resolusyon an Senate Impeachment Court sa huring semana kan Nobyembre o sa enot na semana kan Disyembre. Tinawang-duon kaini na preparado an saindang lado na hampangon an anuman na ebidensyang ipresentar kan depensa.
Mantang nagpapadagos an impeachment proceedings, piglalaoman na tutukan kan kampo ni Duterte an mga paliwanag sa mga dokumento, testimonya asin iba pang evidencia na iprinesentar kan piskalya. Alagad, nagdadanay na mga alegasyon an siring na mga isyu sagcod na magdesisyon an impeachment court base sa mga evidencia asin argumento kan mag-ibong na lado.
