NAGA CITY- Arestado an sarong barangay captain elect asin ABC President sa banwaan nin Bombon, Camarines Sur makalihis an pigkondusir na entrapment operation kan Criminal Investigation and Detection Group (CIDG) Camarines Sur subagong hapon.
Sa entrevista kan Bombo Radyo Naga ki PC/Insp. Ronnie Fabia, pamayo kan CIDG-Camarines Sur, sinaysay kaini na pasado ala-1:30 subagong hapon kan ikondusir an entrapment operation sa Peachelitos Resort sa barangay Sta. Lucia, Magarao, Camarines Sur na nagresulta sa pagkakaarestar ninda barangay capt. elect Allan Vidalio kan barangay Pagao asin incumbent barangay capt. Augusto Laure kan barangay San Roque.
Inireklamo suboot ni punong barangay Florentino Clariño an nasambitang mga opisyal makalihis na suhulan siya kan mga ini nin P100,000 para ibot sana si Vidalio komo presidente sa ikokondusir na Association of Barangay Councils (ABC) election sa nasambitang banwaan sa maabot na bulan nin Hulyo.
Sigon ki Fabia, posibleng mahampang sa kasong pagbalgar sa RA 3019 o an Anti-graft and Corrupt practices act asin Article 212 o Corruption of public officials sa irarom kan Revised Penal Code an nasambitang duwang mga punong barangay.
Napag-araman na nagseserbe suboot komo ABC President sa banwaan nin Bombon an nadakop na si incumbent kapitan Laure.
Sa ngonyan, nagtitinir na suboot sa kostudiya kan CIDG-Camarines Sur an nasambitang mga suspetsado mantang pig-aandam na an kasong isasangat laban sa mga ini.
