NAGA CITY- Nagpoon na an Alay Lakad hale sa ciudad nin Naga pasiring sa banwaan nin Calabanga kun saen nakabugtak an pigtutubudang milagrosong imahe ni Amang Hinulid.
Hale sa nasambitang ciudad, maagi an mga deboto kan Hinulid sa mga banwaan nin Canaman, Magarao asin Bombon antes na makaabot sa kapilya kan imahe sa Calabanga.
Nagpupuon man suboot an paglakaw kan mga deboto alas 2 nin hapon alagad minarhay kan nagkakapira sa mga ini na magpuon nin mas amay para amay man na makaabot sa kapilya sa Sta Salud asin makahadok sa nakahigdang imahe ni Hesus.
Pigtutubudan na nakakarahay nin helang asin nakakagibo nin mga milagro an nasambitang imahe na tuyong Huwebes Santo pigdarayo kan rinibong mga deboto hale pa sa manlaen laeng lugar.
Katakod kaini, mas pinahigot man kan mga kapulisan ang monitoring sa mga lugar na aagihan kan nasambitang Alay Lakad para masierto an seguridad kan mga deboto.
