Pigsierto kan Public Works Secretary na si Vince Dizon na piglalaomang makukulong antes magpasko sinda dating DPWH Bulacan 1st District Engineer Henry Alcantara, dating Assistant District Engineer Brice Hernandez, asin private contractor Sarah Discaya.
Sinda an kaibahan sa enot na reklamo kan DPWH sa Ombudsman kan Setyembre 11 katakod kan siyam na anomalous flood control projects na nagkakantedad nin P249 milyon sa Malolos, Hagonoy, Baliwag, Bulakan, asin Calumpit, Bulacan.
Kaibahan man sa mga pigkasuhan an DPWH employees na sinda John Michael Ramos asin Ernesto Galang, pati na an mga private contractors na sinda Ma. Angeline Rimando, Sally Santos, Mark Allan Arevalo, asin Robert Imperio.
Target ni Ombudsman Jesus Crispin Remulla na magsunad nin kaso sa korte pag-abot kan Nobyembre 25.
Hasta sa ngunyan, mayo pang pahayag gikan sa mga nasasakdal.
