NAGA CITY- Opisyal nang itinao kan alkalde kan siyudad nin Naga an poder asin diskresyon sa mga pamayo kan eskwelahan publiko man o pribado na magdesisyon dapit sa pag-suspende nin klase asin temporaryong pagbwelta sa modular learning.
Ini an makalihis na manutaran an naglalangkaw na kaso kan influenza-like illness sa siyudad.
Sigun ki Naga City Mayor Leni Robredo, makalihis an pigkundusir na konsultasyon sa pag-ultanan kan lokal na gobyerno, Department of Education (DepEd), asin kan mga pamayo nin nagkapirang institusyon nabilog an nasambitan ng desisyon.
Katakod digde, pigtawan duon kan alkalde na an desisyon dapat nakasunod sa protocol kan DepEd asin ipinapautob kan eskwelahan tanganing masierto an marhay na salud asin kasalbaduhan kan gabos.
Marurumduman, kadakol an naire-report na insidente o kaso kan influenza-like illness sa manlaen-laen na eskwelahan sa siyudad nin Naga kun saen an nasambitan ng bareta an nagdadara nin pagkahadit sa publiko.
Apwera digde, an manihamiento man kan Naga City General Hospital an nagsaysay na kadaklan sa mga pasyente na naa-admit an nakakamate nin sintomas nin influenza virus.
Alagad kadaklan sa mga na-admit sa nasambitan ng ospital huli sa nasambitan ng helang an nakarekober na.
Sa ngunyan, hagad na sana kan alkalde an pakikipagtabangan kan publiko tanganing dae na orog pang maglala an nasambitan ng problema.
