Maduon na pigtutulan ninda Davao City Representatives Paolo Duterte, Omar Vincent Duterte, Isidro Ungab asin PPP Partylist Rep. Harold James Duterte an panibagong 60 aldaw na suspensyon kan Kamara ki Rep. Kiko Barzaga.
Sa surat ki House Speaker Faustino Bodjie Dy, saindang pigtawan duon na dapat mangibabaw an pagboto kan ribo-ribong namamanwaan kan ika-apat na distrito kan Cavite para ki Barzaga kumparar sa desisyon kan nagkapirang miyembro kan House Committee on Ethics and Privileges na liwat ining padusahan.
Pigtawan duon pa sa surat na dae dapat gamiton an “disciplinary powers” kan Kamara tanganing selensyuhon an siisay man o baliktadon an demokratikong pagpili kan taumbayan.
Pigsaysay pa sa nasambitan ng surat na an anuman na dae magayon na pahayag ni Barzaga an dae dapat padusahan sa sarong demokratikong komunidad huli ta an right to free expression o katalingkasan sa pagpapahayag an protektado kan konstitusyon.
Pigpunto pa ni Rep. Duterte asin mga kaalyado sa kamara na an korte an tamang lugar tanganing idulog an mga reklamo ki Barzaga asin bako sa Houses Ethics Committee na nagseserbeng tagadepensar kan mga pig-aako na opinyon.
