Magkakasagupa sina Mirra Andreeva ng Russia at Marta Kostyuk ng Ukraine sa final ng Madrid Open matapos nilang manaig sa kani-kanilang semifinal matches.
Tinalo ng ninth seed na si Andreeva si Hailey Baptiste, 6-4, 7-6 (8), habang nanaig naman si Kostyuk laban kay Anastasia Potapova sa tatlong set, 6-2, 1-6, 6-1.
Sa kanyang panalo, naging kauna-unahang teenager si Andreeva na umabot sa tatlong WTA 1000 finals mula nang ipakilala ang format noong 2009.
Nahirapan si Andreeva laban kay Baptiste, na nakapagligtas pa ng ilang match points, ngunit nagawa pa rin niyang makabawi sa second-set tiebreak upang tuluyang maselyuhan ang panalo.
Samantala, ito ang unang WTA 1000 final ni Kostyuk, na nananatiling walang talo sa clay court ngayong season matapos manalo sa Open Rouen Metropole sa France.
Nagpakita ng tibay si Kostyuk matapos matalo sa ikalawang set, ngunit nakabawi sa decisive set upang makontrol ang laban at makuha ang panalo.
Sa kabila ng mas mataas na ranking, sinabi ni Andreeva na hindi niya itinuturing ang sarili bilang paborito sa final at tututok lamang sa kanyang laro at game plan.
