NAGA CITY- Kinikwestyon ngonyan ni Ako Bicol (AKB) Partylist Rep. Rodel Batocabe an pagtatao nin award kan dating regional director kan Police Regional Office (PRO) 5 sa nagkapirang mga personalidad na naiimbwelto an pangaran sa Catanduanes mega shabu laboratory.
Sa entrevista kan Bombo Radyo Naga ki Batocabe, nagngangalas suboot siya tano ta tinawan pa ni dating PNP Bicol director PC/Supt. Melvin Buenafe nin award sinda Catanduanes Gov. Joseph Cua asin Judge Lelu Contreras katakod kan pagtabang suboot kan mga ini sa kampanya kontra droga kan gobyerno.
Ini sa ibong suboot kan pagkakaimbwelto kan pangaran kan nasambitang mga personalidad sa nadiskobreng shabu laboratory asin sa nagpapadagos na imbestigasyon kan gobyerno manungod digdi.
Sigon ki Batocabe, ini an saro sa maga hapot na mawot niyang masimbag ni Buenafe sa oras na maghampang ini sa pagdangog kan House committee on dangerous drugs.
Napag-araman na pigtao an nasambitang mga awards antes na magretiro komo regional director kan PNP Bicol si Buenafe kan bulan sana nin Hulyo.
Mienatrastanto, sa mensahe man na ipinaabot sa Bombo Radyo Naga kan dating PNP Bicol director, an nasambitang mga awards, inirekomendar kan award committe basado sa kontribusyon kan nasambitang mga indibidwal sa kampanya kan PRO5 kontra iligal na droga.
Apwera man suboot ki Cua asin Contreras, kadakol pang mga personalidad an nakaresibe suboot kan kaparehong pagbisto.
Pigpapasakamot naman ni Buenafe sa korte an pagdedesisyon sa sinasabing kulang asin mayong substansya suboot an inilatag na ebidensya kan PNP sa isinunad na kaso laban sa nagkapirang mga indibidwal na pigtutukdong nasa likod kan nadikobreng mega shabu laboratory.
