Aram baya nindo mga ka-bombo, liwat na nakabweltada sa saiyang amo an sarong Ido na nawara huli sa kaso kan panghahabon sa Florida.
Sigun ki Gabrielle Hartley, an saiyang Ido na igwang pangaran na Luca an nawara sa saiyang Tampa apartment kan mag-abot ini gikan sa trabaho pasado alas 4 nin aga kan taong 2018 asin napag-araman na igwang sinyales nin paghahabon sa saiyang pigdadagusan.
Katakod kaini, makalihis an pitong taon pig-apudan ini kan microchip company na PetKey asin sinabi na saindang nahanap na an nasambitan ng Ido.
Sigun sa Tampa Police Department sa saindang social media, igwang sarong pulis na nakakua ki Luca mantang basay-basay ini sa tinampo.
Pigdara ini sa Animal Doctors of South Tampa, kun saen pig-scanned para sa microchip asin digde naman napag-araman pagsasadiri ini ni Hartley.
Sa ngunyan, presenteng pigbubulong si Luca sa sarong veterinary clinic huli sa pigsasapong helang.
