NAGA CITY- Inaaram pa ngonyan kan PNP Zamboanga Sibugay kun saen sa Bicol hale an babae na sinasabing pig-kidnap suboot kan armadong kalalakihan sa Poblacion Malangas sa nasambitang probinsya subanggi.
Sa entrevista kan Bombo Radyo Naga ki PS/Supt. Nestor Tiempo, provincial director kan Zamboanga Sibugay Police Provincial Office, sinaysay kaini na inaaram pa ninda kun saen na probinsya sa Bicol hale an pig-kidnap suboot na si Laarne Bandi, 38-anyos, secretary kan Cibeles Marine Product.
Enot kaini, napabaretang pig-kidnap suboot si Bandi subanggi kan pitong armadong mga lalaki mantang yaon sa saiyang dinadagusang apartment asin dinara sa direksyon kan Muyong Island.
Sigon ki Tiempo, inaaram pa ninda hasta sa ngonian kun ano an posibleng motibo kan mga armadong kalalakihan sa pagdukot ki Bandi.
Pigsierto man kan opisyal na nagpapadagos pa hasta sa ngonian an ginigibong operasyon kan pulisya katabang an mga kabuhan kan manlaen laen pang mga law enforcement unit sa lugar para masalbar an biktima.
