Aram baya nindo mga ka-bombo, sarong pulis bako sa krimen kundi sa pagtabang sa sarong bados na napangaki sa gilid kan gas station sa Manaoag, Pangasinan.
An bados, gikan na palan sa clinic alagad pinauli huli ta pig-akalang dae pa mangangaki hasta sa abutan kan paghilab kan tulak kaini sa tricycle.
Mahihiling sa CCTV footage an ginibong pagpara kan sarong lalaki sa lunadan ni Police Staff Sergeant Niño Pacis.
Kalaunan, nahiling ni Pacis an babae na si Mary Janeth Maximo na nagla-labor na mantang nasa laog kan nakaparadang tricycle.
Kan mapag-araman na kinakaipuhan na an tulos na aksiyon asin tabangan an babae, nagpakua ini nin tamong na pwede kaining gamiton.
Sigun ki Pacis, pirang oras saa an nagluwas na an omboy.
Sinaysay ni Maruy na kakahali sana kaini sa sarong midwife, alagad pinauli ini huli ta duwang sentimetrong dilated pa sana soboot ini.
Huli sa marekas na pag-iisip ni Pacis, salbado na pigmundag ni Mary an sarong malusog na aking babae na pigpangaranan na si Benice Mackenzie.
Nagpasalamat man si Mary sa nagtabang sa saiya huli ta mayong nangyaring maraot soboot sa saiya.
Inapod man kan netizens na bayani si Pacis, alagad para sa pulis, ginibo sana kaini an dapat sa oras na ito tanganing mamantinir an kasalbaduhan kan mag-ina.
Sa ngunyan, si Mary an nakauli na kaiba an saiyang aki asin ini man an nasa marhay na nin kamugtakan.
