NAGA CITY- Piglunsar kasuudma, Hunyo 18, 2024 an bagong Tourism Brand kan Naga City, an pig-aapod na NAGA’YON.
Sa nagin paghampang sa mga kagawad kan media ni Naga City Councilor Jose Perez, sinaysay kaini na obheto kan nasambitan ng programa na mai-capture an Imahe asin karakter kan bilog na siyudad puon sa mga tawo, kultura, lugar, pagkakan, tradisyon asin mga pagtubod.
Sigun ki Perez, sa paagi kan bagong Tourism Brand mas maipapabisto asin madaling matatandan kan publiko an Naga City na dakula man katabangan sa pagpapa-uswag kan ekonomiya.
An NAGA’YON pigbilog an persperktibo kan duwang tataramon na an boot sabihon to mean something and to create community.
Antes man na mabilog an bagong Tourism Brand na ini, nagkaigwa muna nin konsultasyon sa manlaen-laen na magkakanigong opisina tanganing mapag-ulayan pa nin marhay an pinaka-obheto kan programa na ini.
Dugang pa kan opisyal, importante an pagsuporta sa tourism sector kan sarong lokalidad nin huli ta sa paagi kaini naiha-highlights an gayon kan lugar asin kan mismong tawo; nagtatao nin kabuhayan sa mga residentes siring na sana kan pagigin tour guide; nakakatabang sa pagpapa-angat kan mga negosyo na makakatabang man sa pagpapa-uswag kan ekonomiya; makakatabang sa pagpreserba kan mga heritages site asin manlaen-laen pa na cultural area.
Katakod kaini, magsasagibo man nin mass promotion kan NAGA’YON an lokal na gobierno kan Naga siring kan kampanya sa mga opisina, ahensiya, stakeholders, resort, hotel, restaurant asin iba pa tanganing mas mapadali an pagpapabisto kan bagong branding kan siyudad.
Apwera digde, kahagadan man kan saindang lado na i-promoter kan mga vlogger asin iba pang social media influencer an NAGA’YON tanganing mas marekas na matandaan kan publiko.
Sa ngunyan, pigsierto na sana kan opisyal na mas orog pang madevelop asin mauswag an Naga City sa paagi kan pagpapakarhay sa tourism sector kan siyudad.
