NAGA CITY- Padagos pang inaaram ngonyan kan Philippine Army an pagkakabistuhan kan duwang pinagtutubudang mga miyembro kan rebeldeng New People’s Army (NPA) na nagadan sa nangyaring bakbakan sa parte kan Lopez, Quezon kan nakaaging Semana Santa.
Sa impormasyong ipinaabot kan Division of Public Affairs Office (DPAO) kan 2nd Infantry Division, Philippine Army, nagkondusir suboot nin combat patrol an mga kabuhan kan 59th Infantry (CAFGU) Battalion sa barangay San Andres sa nasambitang banwaan kan alas-11:12 nin banggi kan Sabado de Gloria makalihis na makaresibe nin impormasyon na nagpaplano an mga rebelde na mag-atake sa San Andres Patrol Base.
Tulos man na nagkua kan mga CAFGU an lugar na pigtaguan kan mga rebelde na nagresulta sa limang minuto na riribayan nin putok kan duwang lado kun saen nawalat kaini an duwang bangkay kan dae pa nabibistong miyembros suboot kan NPA.
Narekober man sa lugar na pinangyarihan kan bakbakan an M16 rifle, AK-47, ICOM radio, duwang granada asin tolong mga backpack.
Basado sa mga militar, pigtutubudang miyembro suboot an mga NPA kan Platoon 2 of Sub-Regional Military Area (SRMA) na nag-o-operar sa probinsya nin Quezon.
Mientrastanto, nagpaparahay na sa ospital an sarong CAFGU na nairido sa nangyaring bakbakan.
Sa ngonyan, nagpapadagos pa an pinahigot na pursuit operation kan mga soldados sa lugar asin nagkondusir naman nin mga checkpoints sa mga pagtaraid na lugar para malapag an nagdurulag na mga miyembros pa kan makawalang grupo.
