NAGA CITY- Arestado an mag-live in partner makalihis an pigkondusir na anti-illegal drugs operation kan mga otoridad sa Ragay, Camarines Sur.
Binisto an mga suspek na sinda Joy Masalonga, 39-anyos asin Jennifer Tapalla, 29-anyos.
Sa nakuang impormasyon kan Bombo Radyo Naga, napag-araman na pigserbe kan mga kabuhan kan Ragay PNP asin kan CIDT Camarines Sur an duwang search warrant sa harong kan mga suspek sa barangay Lohong sa nasambitang banwaan.
Narekober sa mga suspek an sarong caliber 45 pistol, manlaen laeng klase nin bala, anom na sachet nin pigtutubudang shabu asin mga drug paraphernalia.
Mientrastanto, naarestar man sa banwaan nin Pili sa parehong probinsya an suspek na si Reynante Ricafort, 35-anyos makalihis an pigkondusir na buy-bust operation kan mga kabuhan kan Pili PNP asin kan Philippine Drug Enforcement Agency (PDEA) sa barangay San Jose.
Nakumpiskar sa pag-iingat ni Ricafort an sarong medium asin small size plastic sachet na naglalaog nin shabu.
Nagtitinir na ngonyan sa kostudiya kan mga otoridad an nasambitang mgaq suspetsado mantang pig-aandam na an kasong isasangat laban sa sainda.
