NAGA CITY- Posibleng magkaigwa suboot nin pagbagal sa nagkapirang mga programa asin proyekto kan Department of Tourism (DOT) katakod kan pigpapautob na balasahan digdi.
Sa entrevista kan Bombo Radyo Naga ki DOT Bicol director Benjamin Santiago, sinaysay kaini na posibleng magresulta sa ‘temporary setback’ sa nagkapirang mga programa kan ahensya an direktiba ni Tourism Sec. Bernadette Romulo-Puyat na magsumiter kan saindang courtesy resignation an mga undersecretary asin assistant secretary kaini.
Sigon ki Santiago, suportado niya an nasambitang lakdang kan sekretaryo para matawan ini nin pagkakataon na makapili nin mga opisyal na makakatabang sa ahensya.
Mientrastanto, aminado man an opisyal na dae pa ninda masierto sa ngonyan kun posibleng magkaigwa man nin balasahan sa lebel kan mga regional directors.
Sa ibong kaini, pigsierto man ni Santiago na nakaandam siyang magsunod sa anumang kasuguan ni Sec. Puyat asin naglaaom ini na dae mahaloy an ‘adjusment phase’ na ini sa ahensya.
