NAGA CITY– Siniyerto kan 9th Infantry Division, Philippine Army na mas papahiguton pa ninda an ginigibong operasyon asin monitoring kan mga militar sa Cawayan, Masbate makalihis an nangyaring bakbakan sa hultanan kan tropa kan gobyerno asin rebeldeng New People’s Army (NPA) kan nakaaging semana.
Sa entrevista kan Bombo Radyo Naga ki Capt. Joash Pramis, chief kan Division of Public Affairs Office (DPAO) kan 9ID, sinaysay kaini na mas mahigot sindang nakikitabangan sa iba pang mga law enforcement agencies sa lugar tanganing madakop an mga rebelde na nakaenkwentro kan mga CAFGU hale sa Del Carmen Patrol Base na nangyari sa Barangay Daan Mactan.
Mientrastanto pighahalat pa kan 9ID an mga kaparyentes kan pigtutubodang NPA na nadiskobre an lawas na may tama nin bala haros 430 metros an rayo sa pinangyarihan kan enkwentro.
Marurumdoman na nagsagibo nin combat patrol operation an mga CAFGU kan makaenkwentro kan mga ini an nasa 30 mga NPA sa nasambitan ng lugar na nagresulta sa pagkagadan ninda CAA Henry Nulla asin CAA Vicente Prieto mantang nagpaparahay pa sa ospital an apat na mga Cafgu na nairido sa pangyayari.
