Tangani magkaararaman na an kung siisay an may ‘hidden wealth, ipinasisirip ni Akbayan Partylist Rep. Chel Diokno ki Department of Public Works and Highways (DPWH) Vince Dizon an mga bank accounts kan gabos nin mga empleyado asin opisyal kan ahensiya.
Ini an sa tahaw na man kan nabuyagyag na mahewasang korapsyon sa DPWH sa mga infrastructure projects orog na sa flood control projects na kun dae overprice, substandard an mga materyales asin an pinakamalala iyo an ghost projects.
Ginibo ni Diokno an rekomendasyon makalihis mag promisa si Dizon na halion kan ahensiya an mga tiwaling opisyal sa laog man kan 60 aldaw, magpuon sa saiyang pangapudan sa gabos nin opisyal na magsumiter nin courtesy resignation na sa update kan Sekretaryo an nasa 100% na nag-comply na an gabos.
Tangani maipreserba man an mga ebidensya, pig abiso ni Diokno basado sa saiyang background sa legal profession na mag-isyu si Dizon nin Department Order na nagse-secure sa gabos nin electronic device na itinao kan gobyerno siring na sana kan mga computer na pwedeng ginamit kan mga nadismis o nagretiro asin magin kan mga nagsipagbutas na sa tungkulin sa tahaw na man kan anomalya sa flood control projects sa mga ini.
Ipinaliwanag pa ni Diokno na an Korte Suprema an nag-isyu nin panuntunan sa cyber warrants na pwedeng i-apply o magamit sa gabos nin kaso siring kan korapsyon na ginibo gamit an mga electronic o computer device.
Nakikipag-koordinar na man si Dizon sa Commission on Audit asin makikipagkoordinar man sa PNP Cybercrime Unit tangani hagadon an tabang kan mga ini sa pagsasampa nin kaso sa mga tiwaling executives kan DPWH.
