Pigbabantayan kan CBSUA-Pili Agromet Station an posibleng epekto kan El Niño sa Bicol Region, kasunod kan piglalaoman na pagpapadagos kan El Niño sagkod sa kabangaan kan masunod na taon.
Sa intrevista kan Bombo Radyo Naga ki Ian Neil Nuñez – Officer-In-Charge, CBSUA-Pili Agromet Station, sinabi pwedeng makusog na marhay asin maghaloy nin halawig an El Niño.
Piglalaoman na makakaeksperyensya nin below-normal na pag-uran an Bicol sa mga masunod na bulan. Huli kaini, posibleng maggrabe an kawaran nin uran asin magresulta sa dry spell kun magpapadagos an kamugtakan na ini.
Alagad, piglinaw na an kawaran nin uran kan mga nakalihis na aldaw dae man maiaatribwir sana sa El Niño. Segun sa eksperto, nakakaapektar man digdi an Madden-Julian Oscillation o MJO, sarong atmospheric phenomenon na pwedeng magpakusog o magpugol kan pag-uran mantang ini naglilibot sa equator.
Pag-abot kan Oktubre asin sa mga masunod na bulan, piglalaoman na mas mamamatian an epekto kan El Niño huli sa forecast na below-normal rainfall sa rehiyon. Kasabay kaini, padagos na babantayan an kamugtakan kan panahon tangani na maaraman kun malala pa an rainfall deficit.
Sa huma nin halawig na tag-init, importante para sa mga komunidad asin sektor na nagsasarig sa supisyenteng pag-uran, partikularmente an agrikultura, na magdanay na alerto. An CBSUA-Pili Agromet Station padagos na matao nin monitoring asin impormasyon manungod sa pagbabago kan panahon asin posibleng epekto kan El Niño sa Bicol.
