Padagos an pagpapatuman nin manlaen-laeng lakdang sa Barangay Caroyroyan sa Pili, Camarines Sur tanganing makalikay an mga residente sa Dengue.
Sa intrevista kan Bombo Radyo Ki Jerry Canave – Barangay Captain, Caroyroyan, Pili, Camarines Sur, sinaysay kaini na may mga ipinapatuman na direktiba hale sa Department of Health (DOH) sa barangay, asin may mga isinasagibo man na interbensyon an lugar, kaiba an pag-iikot asin pagtukoy sa mga lugar na posibleng pamugaran kan mga lamok na nagkakalat nin dengue.
Segun ki Canave, an dengue nakukua sa kapalibotan asin an paglikay kaini nasa mga residente sa pagmantener nin kalinigan kan saindang palibot.
Kaiba sa mga isinasagibo kan barangay an pag-spray asin paglalaag kan mga medisina o iba pang itinatao kan DOH para sa paglikay sa dengue.
Nagpagirumdom man siya sa mga residente na pirming maglinig kan palibot asin pataubon o takloban an mga container, lata, asin iba pang laganan na may tubig tanganing dai magin pamugaran kan lamok..
Pig-enkaminar man an mga residente na makipagtabangan sa mga isinasagibong programa kontra dengue asin tulos na ipaaram sa mga awtoridad an mga lugar na posibleng pamugaran kan lamok.
