Ipinaliwanag kan sarong abogado an nagkapirang isyu na may kinaaraman sa implementasyon kan mga ordinansa sa barangay, partikular na an curfew, noise ordinance asin vagrancy.
Sa intrevista kan Bombo Radyo Naga kay Atty. Clarence Joseph M. Ronquillo – Trial Lawyer, sinabi kaini an barangay ordinances iyo an mga orden na ipinasa tanganing i-regulate o ipagbawal an nagkapirang aktibidad na nasa laog kan hurisdiksyon kan sarong barangay.
Pigtawan-duon kaini na an curfewnakatutok sa mga menor de edad bilang lakdang para sa saindang proteksyon asin kaligtasan. Mientrastanto, sa sarong ordinansa sa ribok, pwedeng magbugtak nin oras an barangay kun nuarin kaipuhan na mapundo an mga aktibidad na nagdadara nin ribok, arog kan videoke, kun ini nasususog sa eksistidong ordinansa lokal.
Lininaw man ni na bako nang criminal offense an vagrancy. Dae man suboot awtomatikong maapod na vagrant an sarong tawo na basta na sana magtambay sa luwas, lalo na kun yaon sana sa atubangan kan sadiring harong asin mayo man nin ibang nagigibong bayolasyon. Alagad, pwede man giraray madakop an sarong tawo kun magbalga ini nin iba pang ordinansa, arog kan pagbabawal sa pag-inom o pagmukna nin kariribokan sa pampublikong lugar.
Manungod sa ginibong aksyon kan barangay tanod, sinabi ni Ronquillo na kun simpleng pagbalga sa ordinansa kan barangay an bagay pwede nang irefer sa barangay para sa due process. Alagad kun may nangyaring aktuwal na krimen, pwedeng basehan ini para darahon sa pulis an pangyayari, depende sa mga sirkumstansya asin aplikableng ley.
Nangapudan si Ronquillo sa publiko na magin kalmado asin igalang an mga barangay tanod na nagsasagibo kan saindang trabaho. Kun nagtutubod sinda na bakong makatanosan an pagbisita o pag-arestar, pwede nindang isumbong sa barangay tanganing ma-imbestigaran asin madangog an duwang lado. Importante suboot na mag-agi sa tamang proseso tangani na masolusyunan an anuman na reklamo o iriwal.
