NAGA CITY- Labing kaugmahan ngonyan an namamatean kan Bicol delegation makalihis na makakua na naman nin gold medal an Bicolana athlete na siyang nakakua kan kaenot-enoting medalya sa pagpupuon kan Palarong Pambansa 2018.
Sa entrevista kan Bombo Radyo Naga ki Lheslie de Lima, hale sa Baao, Camarines Sur, sinaysay kaini na dae pa siya makatubod na liwat na naman siyang nakakua nin gold medal sa saiyang laban subago sa 1,500 meter run urog pa ta mahigot suboot niyang kalaban an delegado hale sa Region 10 o an Northern Mindanao Regional Athletic Association (NMRAA).
Sigon pa ki Lheslie, pangadyi antes an pagpupuon kan saiyang kada kawat an saiyang sekreto para magtrayumpo.
Dae man minate kan 13-anyos na atleta an init kan oval dawa na nakabitis siyang nagdadalagan huli ta tuod na suboot ining magdalagan na mayong sulot na sapatos.
Saaga, nilalaoman na makakakua pa nin gold medal si Lheslie sa huri niyang laban sa 800 meter run sa ikalimang aldaw kan Palarong Pambansa 2018 sa Vigan, Ilocos Sur.
