NAGA CITY- Gadan an sarong lola mantang padagos pang pighahanap an duwang persona makalihis na maglubog an piglulunadan nindang baroto sa kadagatang sakop kan Garchitorena, Camarines Sur.
Sa entrevista kan Bombo Radyo Naga ki PO3 Philip Candor, hale sa PNP Garchitorena, sinaysay kaini na alas-7 nin aga suodma kan maglawod sa kadagatan sinda Maria Marilyn Mapa, 62-anyos; Alvin Mapa, 23-anyos; Adrian Marasigan, 10-anyos asin si Angelica Marasigan, 8-anyos tanganing magpasiring sa barangay Sumaoy sa parehong banwaan.
Mantang yaon suboot an mga ini sa tahaw kan kadagatan kan magtama sa saindang lunadan an makukusog na hukol asin duros na nagresulta sa pagkaraot kan piglulunadang baroto.
Maswerte man na naisalbar kan mga parasira sa lugar an maglola na sinda Maria Marilyn asin Adrian alagad kan nasa baybayon na suboot an mga ini, pig-atake sa puso an nasambitang gurang.
Sigon ki Candor, padagos pa nindang pighahanap hasta sa ngonyan an 8-anyos na aking babae asin an tiyuon kaini.
Mientrastanto, sa suway man na entrevista ki Michael Francisco, hale sa PAGASA DOST-Legazpi, sinaysay kaini na nakataas suodma an gale warning sa rehiyong Bicol.
Mawot sabihon suboot kaini, mahigot na pigpapangalad an paglawod kan mga sararadit na lunadang pandagat huli sa makukusog na hukol sa kadagatan.
Sa ngonyan, nagpapadagos pa an pigkokondusir na search and rescue operation kan mga otoridad tanganing mahanap an nawawarang mga pasahero kan naglubog na baroto.
