NAGA CITY- Dawa labi an pagkadisganar sa pigpahiling na aksyon kan Gilas Pilipinas, aminado an sarong Basketball Coach na napabilib siya sa kontroladong emosyon kan mga Australia Boomers.
Sa entrevista kan Bombo Radyo Naga ki JC Nuyles, Basketball Coach kan Sacred Heart School – Ateneo de Cebu na tubong Camarines Sur, sinaysay kaini na an nasambitang laban sa pag-ultanan kan mga players kan Pilipinas asin Australia an saro sa pinakamatinding rambol sa istorya kan international basketball game.
Naiintindihan niya na nakubanan an gabos alagad dae suboot nag-asir an function kan mga coach kan Gilas na makontrol an mga bench players na dae makiaram sa nangyaring kariribukan sa court.
Saro pa suboot sa nakakasupog, an naglakop na video asin mga litrato kun saen nakuanan an sarong Coach kan Gilas na imbes na pakalmahon an mga players, nagtabang pa ini sa nangyaring pambabanog.
Sa ibong na lado, dae man ni Nuyles napugulan na mapabilib sa pagigin disiplinando kan mga bench players kan Boomers.
Magayon man suboot an nagin enot na lakdang kan mga Australian coach na pakalmahon asin kontrolon an saindang bench players para dae na makadugang pa sa nasambitang kariribukan.
