NAGA CITY – Pigtawan-duon kan highway patrol group sa Bicol Region an batas trapiko, kun saen an dae pag-utob digde an saro sa mga nagigin rason kan aksidente sa tinampo.
Sa nagin paghampang sa mga kagawad kan media ni PCOL Dave Antonio Mejia – Chief, Regional Highway Patrol Unit, sinaysay kaini na nagkukundusir soboot sinda nin seminar sa gabos kan mga probinsiya asin munisipalidad kan nasambitan ng rehiyon tanganing magtao nin kaaraman kun pano magkaigwa nin kortesiya asin respeto sa lambang drivers huli man ta digde nagpupuon an pagkakaigwa nin mga road rage kun mayo nin respeto an lambang drivers asin sa dae pagsunod sa batas trapiko.
Dugang pa kaini, saro pa sa mga nagigin rason kan aksidente an huli man sana sa mga drivers kun saen minsan aram man sana kan mga ini na raot an tinampo ta pigpapakarhay, marekas pa man giraray an padalagan, siring man an lack of defensive driving, asin an kulang sa disiplina.
Mientrastanto, sigun pa sa opisyal, antes makakua nin lisensiya an mga drivers nagkakaigwa ini nin trainings alagad minsan dae soboot kan mga ini pig-aapply an saindang nanudan.
Pigtawan-duon pa ni Mejia na antes maglunad an mga drivers sa saindang lunadan dapat pigkokonsiderar kan mga ini an saindang physical na aspeto, emotional magin an psychological na dapat ini an magin normal tanganing dae ma-blangko sa tahaw kan tinampo asin makalikay sa anuman na disgrasya.
Sa ngunyan pagiromdom na sana kan opisyal na orog na sa mga drivers na dae magmaneho kun nakainom, siring man dae na maggibo nin kun ano pa mantang nagda-drive asin mantiniron an pagigin disiplinadong driver tanganing malikayan an aksidente sa tinampo.