Marhay soboot an bentahan kan burak sa siyudad nin Naga kasabay sa pagselebrar kan Valentine’s Day.
Sa entrevista kan Bombo Radyo Naga ki Julita Ador Capistrano, kan Pacol Flower Farm, sinaysay kaini na antes pa an aldaw kan mga puso ngunyan na Pebrero 14 kadakol naman an mga nagpasiring sa sainda tanganing magbakal nin manlaen-laen na klase kan burak.
Sigun ki Capistrano kadaklan soboot sa mga nagin costumer ninda an mga nagbu-buy and sell.
Boot sabihon, nagbabakal nin mga burak asin liwat man ninda ining ipapabakal sa mas dugang na presyo.
Katakod digde, an pinakamabenta na klase kan burak iyo man an sunflower naa imported kun saen nagkakantedad nin P80 hasta P100.
Apwera digde, nagtatangro man soboot sinda nin naka-arrange na asin iba pang klase kan burak na pighahanap ngunyan na aldaw nin mga puso.
Mientrastanto, pigsaysay man ni Capistrano na naka-apektar man an pag-uuran na naeksperyensiyahan kan nakalihis na bulan asin mga aldaw sa saindang mga tinanom na burak, kun saen nagdara nin pagkalugi.
Sa ngunyan, pig-enkaminar na sana kaini an mga mahabol pa sa Valentine’s Day na magpasiring sa saindang Farm nin huli ta kadakol pa soboot na mapagpipilian na klase kan burak para sa saindang mga namomootan.
