Pinakusog kan Bureau of Fisheries and Aquatic Resources o BFAR-Bicol an mga lakdang sa pagtabang sa mga parasira asin aquaculture operators na apektado kan El Niño, partikular sa paglikay sa pagkagadan kan mga sira asin pagbawas sa posibleng lugi sa sektor kan pagsisira.
Sa intrevista kan Bombo Radyo Naga ki Wheng Bricia-Briones, Spokesperson, BFAR-Bicol, sinabi kaini na nasa 2,488 na parasira sa mga probinsya kan Camarines Norte, Masbate asin Catanduanes an apektado kan na-eeksperyensyang El Niño. Nagrehistro man nin tinatayang ₱26.57 milyonna kantidad nin danyos sa sektor nin parasisira.
Kabilang sa mga epekto kan taas na temperatura an pag-init kan tubig sa mga siraan, pagkaraot kan kalidad kan tubig, pagkahiro kan lebel kan dissolved oxygen, asin pagkagadan kan mga sirang pig-aataman.
Kabilang sa mga apektadong produkto an tilapia fingerlings, seaweeds asin bangus.
Bilang tugon, padagos an BFAR-Bicol sa pagtao nin teknikal na asistensya sa mga lokal na gobyerno asin parapangisda, kabilang an pagsusuri sa kalidad kan tubig, fish health services, diagnosis kan mga sakit sa sira, asin pagtao nin libreng fingerlings sa mga kwalipikadong benepisyaryo.
Pigpagirumduman man kan ahensya sa mga parasira na sundon an good aquaculture practices, likayan an sobrang pagpakakan asin sobrang paglalaag kaini sa palaisdaan, regular na bantayan an temperatura asin kalidad kan tubig, asin magtao nin sapat na aeration tanganing mapataas an suplay nin oxygen.
Dugang pa ni Briones, importante na maagap na magreport sa Municipal Agriculture Office o sa pinakaharani na opisina kan BFAR kun may mapansing kakaibang pagbabago sa tubig o pagkagadan kan mga sira, tanganing maagapan an posibleng mas dakulang pinsala.
Mientrastanto, positibo man an pinakahuring monitoring kan BFAR sa red tide sa rehiyon. Base sa Shellfish Bulletin No. 25 na may petsang Oktubre 16, negatibo sa red tide toxins an mga minomonitor na lugar sa Bicol sa panahong ini. Gayunman, pinapayuhan an publiko na padagos na sundon an opisyal na mga advisory kan ahensya.
Pigtawan-duon man ni Briones an importansya na mag-andam asin maghimo nin maagap na aksyon an mga parasisira, imbes na maghalat na maapektaran an mga ataman na na sira bago magtao nin solusyon. Huli sa dai maiiwasan an El Niño, posible na mabawasan an epekto kaini sa paagi sa tamang pag-ataman, regular na monitoring asin pakikipag-ugnayan sa mga fisheries technician.
