NAGA CITY – Preparado na an BFP Goa sa papaabuton na bagong taon.
Sa entrevista kan Bombo Radyo Naga ki FO1 Jensen Joseph D. Escuro, Public Information Officer, DPO, Nozzleman, BFP Goa pigsaysay kaini na regular man sindang nagsasagibo nin pagbandilyo asin inspeksiyon sa mga lugar partikular na sa mga paratienda kan paputok.
Kaibahan sa mga pig-inspeksiyon an mga fire extinguisher asin mga first aid kan mga tindahan.
Mientrastanto, an designated area kan mga paratienda harani sa terminal kan Goa parte kan Barangay Bagumbayan Grande.
Sa ngunyan mayo pa man naikurit na insidente kan paputok sa mga residentes huli ta padagos man an pagbabantay kan mga otoridad.
Siringman 24/7 na nakaantabay an BFP enkaso igwang emerhensiya man na mangyari.
Pig-eenkaminar man an mga residentes na kun pupwede maggamit na sana nin alternatibong kagamitan na salbado sa pagsabat sa bagong taon kumparar sa mga paputok na pwedeng makadanyar nin buhay.
Pagirudom man kaini na siertuhon na maayos an electricidad asin perming may mga laog an balde nin tubig partikular na sa mga tindahan kan paputok.
