NAGA CITY- Nakafull alert status na an lado kan Bureau of Fire Protection (BFP)-Iriga katakod kan nagrarani o pirang oras na sana antes an paglaog kan bagong taon.
Sa entrevista kan Bombo Radyo Naga ki FO3 Mario Orbita, Tagapagataram kan Iriga City Fire Station, sinaysay kaini na antes pa man mag-abot an kapaskuhan, urualdaw na sindang nagsasagibo nin pagbabandilyo tanganing magpagirudom sa publiko kun ano an saindang dapat gibuhon tanganing malikayan an kasulo.
Katakod kaini, antes pa man an nasambitan ng mga kasiributan, nagkapirang insidente na nin kasulo an saindang nairehistro siring kan vehicular fire. Apwera pa digdi, mayo pa man soboot nakakaabot sa saindang opisina na igwa nin naputukan sa saindang banwaan.
Pigtawan-duon man kan opisyal na pirming preparado an saindang lado sa anuman na klase kan emerhensiya kun saen, puon alas-4 nin pagkahapon ngunyan na aldaw, nakabantay na sinda sa saindang lugar hasta saaga o paglaog kan 2025.
Mientrastanto, liwat man na nagpagirumdom an opisyal na gibuhong salbado an pagsabat sa bagong taon, asin dae paglaog sa alanganin sa sitwasyon an saindang mga kaparientes. Ini an sa paagi kan dae paggamit nin paputok orog na kun bako sa designated areas kan mga fireworks display.
Mahigot man ipinagbabawal an pagsulo kan goma o gulong kan behikulo siring man an pagbantay sa mga pailaw tanganing makalikay sa posibleng pagbungkaras kan kasulo. Enkaso man may manunataran na kasulo, pupwede soboot mag-apod sa saindang contact sa 09182417423.
