Nakatalaang makipagkarera an ricing Filipina racing talent na si Bianca Bustamante sa Eurocup-3 Winter Series asin Eurocup-3 Championship Series sa 2026 kaiba an Palou Motorsport.
An debut kan 20 anyos na si Bianca Bustamante sa Eurocup-3 an ikukundusir sa Pebrero 20-22 sa primerong round kan tulong-event na 2026 Eurocup-3 Winter Series, na isasagibo man sa Autódromo Internacional do Algarve kan Portimao sa Portugal.
An ikaduwang round magpuon Pebrero 27 hasta Marso 1 an ikukundusir man sa Circuit del Jarama sa Spain, mantang an pantulo asin huring round an isasagibo sa Marso 13-15 sa Motorland (Circuito Motorland Aragón Rodadas) sa parehong nasyon.
Komo saro sa mga nangenenot na single-seater team sa kinaban, an pakikipagsosyo sa PREMA Racing an matao ki Bustamante nin benepisyo gikan sa mga nangenenot na engineering support, simulator tools, asin mga advanced technical resources mantang naghehewas ini sa European competition kaiba an Palou Motorsport.
Kasunod kan sarong importanteng season sa GB3 Championship kan 2025, an paglipat sa Eurocup-3 an nagrerepresenta sa saro pang estratehikong lakdang pasiring sa panghaluyang obheto ni Bustamante na makipagkumpetensya sa FIA Formula 3 asin sa huri an sa Formula 1, na matao sa saiya nin importanteng mileage laban sa sarong competitive mixed international grid.
