NAGA CITY- Pig-abisuhan kan state weather agency sa may parte kan Pili-Camarines Sur an mga residente sa probinsiya kan Camarines Sur asin Bikol Region na mag-andam o magpreparar sa posibleng epekto kan Tropical Storm Ada.
Sa entrevista kan Bombo Radyo Naga ki Ian Neil Nuñez, OIC kan CBSUA-Pili Agromet Station, sinaysay kaini na an nasambitan ng bagyo an maluya maghiro kun ikukumparar sa mga nakalihis na bagyo. Alagad, kabali na an Camarines Sur sa nababanderahan kan Tropical Cyclone Wind Signal No. 1.
Boot sabihon, sa laog kan 24 oras maeeksperyensiyahan na an epekto ni Bagyong Ada kun kaya kaipuhan na magin alerto an publiko.
Sigun pa ki Nuñez dae nagbago an hiro kan Bagyo alagad laog pa man giraray an Camarines Sur sa cone of uncertainty.
Siringman, enkaso dae magsadsad patoo an bagyo mayong landfall na lalaoman alagad makakaeksperyensiya pa man giraray nin makusog na duros asin uran an Kabikolan.
Mientrastanto, nagtitinir man sa Tropical Storm an kategorya ni Ada kun kaya enkaso dae na magbago pa nin hiro asin kusog posibleng dae na maglangkaw pa sa Tropical Cyclone Wind Signal No. 2 an ibabandera.
Sa ngunyan, padagos na pig-enkaminar kan opisyal an publiko na pirmeng magmonitor sa kamugtakan kan panahon tanganing malikayan an mga untowards incidents.
