Pigsaysay kan state weather agency kan nasyon sa may parte kan Pili, Camarines Sur na posibleng maka-esksperyensiya nin saro hasta duwang bagyo an Bicol Region ngunyan na bulan nin Hunyo.
Sa entrevista kan Bombo Radyo Naga ki Ian Neil Nuñez, OIC kan CBSUA-Pili Agromet Station, sinaysay kaini na huli sa Habagat asin pagbabago kan klima o panahon posible an nasambitan ng raot kan panahon na madara nin mga pag-uuran sa may parte kan Rehiyong Bicol.
Marurumduman, opisyal nang pigdeklarar kan state weather bureau an pagpupuon kan Habagat o southwest monsoon season sa Pilipinas.
Ini an huli sa low-level southwesterly winds asin frontal System sa mga nagkapirang parte kan nasyon siringman an pagluya kan easterlies.
Huli kaini, laoman an madalas na pag-uuran asin pagdaguldol partikular sa western section kan nasyon asin an peryodo kan monsoon breaks. Nangangahulugan man an Habagat nin pag-uuran sa mga masunod na aldaw.
Apwera digde, an haros mga lugar sa nasyon an makakaeksperyensiya nin mapanganuron hasta sa mapanganuron na kalangitan na igwang kaibahang pagkikilat asin pagdaguldol.
Posible man an mga pagbaha o pagrasay nin daga na resulta kan kamugtakan kan panahon.
Sa ngunyan, padagos an pangapudan kan opisyal sa publiko na pirmeng i-monitor an weather conditions kan tanganing magin preparado ara-aldaw.
