Opisyal na natapos ngonian na Oktubre 17 an 2026 Bicol Regional State Colleges and Universities Athletic Association (SCUAA) Meet kun sain an Bicol University an nagluwas bilang overall champion makalihis na manggana nin 247 medalya, kabale an 142 na bulawan, segun sa Commission on Higher Education (CHED) Region 5.
Sa intrevista kan Bombo Radyo Naga ki Dr. Demetrio Pascua Anduyan Jr. – Regional Director, Commission on Higher Education—Bicol, sinabi kaini na sinundan kan Bicol University an Sorsogon State University, mantang an Camarines Sur State Polytechnic Colleges, Central Bicol State University of Agriculture, asin Catanduanes State University kabali man sa mga nangengenot na eskwelahan, base sa datus na ipinaabot sa intrevista kan Bombo Radyo Naga.
Segun ki Anduyan, an matrayumpong pagkasagibo kan mga kawat huli sa suporta kan mga lokal na gobyerno sa lugar kan Partido asin pagtatarabangan kan mga nagpartisipar na institusyon. Labing 3,000 na mga atleta, coaches, trainers, asin opisyales hale sa mga estadong unibersidad asin kolehiyo sa Rehiyon Bikol an nagpartisipar sa kompetisyon.
Tinawan duon man kan opisyal na an mayor na katuyuhan kan SCUAA bako sana an pagkua nin medalya, kundi an pagbilog nin disiplina, skills, asin pangkagabsan na pag-uswag kan mga estudyante sa paagi kan sports. Dai man sinda nakaresibe nin mga report nin mga seryosong insidente sa laog kan mga kawat, dawa ngani an pagsierto kan kaligtasan asin karahayan kan gabos na delegado nagdadanay na pinakamahalaga.
Dugang pa kaini na an sports nagseserbing paagi tanganing mapakusog an katoninongan asin pagkasararo sa Bicol Region, orog na sa pagpreparar kan mga representante para sa national SCUAA.
