NAGA CITY– Aminado si Camarines Sur 3rd District Representative Gabby Bordado na saro siya sa nabigla sa nangyaring biglaang pagbabago kan House leadership kasuudma.
Sa entrevista kan Bombo Radyo Naga ki Bordado sinaysay kaini na dawa may mga huring-huding na sa planong pagpapatalsik ki dating House Speaker Pantaleon Alvarez, alagad dae ninda piglalaoman na mangyayari ini sa mismong aldaw kan State of the National Address (SONA) ni Presidente Rodrigo Duterte.
Napangirit man si Bordado na imbes na an SONA kan presidente an sentro kan aktibidad, garo nagin highlight soboot kasuudma an mga pangyayari sa Kongreso.
Katakod kaini, huli sa kawaran soboot nin bastanteng paliwanag asin impormasyon sa mga biglaang pangyayari kaya naisipan na sana kan kongresista na mag-abstain sa botohan.
Sa ibong kaini, pighahalat na sana soboot ninda kung ano ang mga masunod na mangyayari ngunian na aldaw sa pagtukaw ni Rep. Gloria Macapagal Arroyo komo bagong House Speaker.
